Jodi a se jounen mondyal resiklay
pwopagann sou baboukèt
se pou sa
Y a va fonn solèy anndan w
depane yon latriye zetensèl
pou dekore kè tounen w
bay soupi w azil ak yon jèb flè

Y a va lejitime pousyè pye w
Ak yon pwezi lavanm metanm
Mete soufrans ou sou de ran
pou ranje chita w nan jounal
kote medizans akwoupi

Y a bay kouraj ou grad
Pou kanpe yon fyète doubkabin anndan w
separe jounen an ren pou ren
Pou leve anbago w

Selman…
Padon pa rense kè
Malè n gen mèt deja
se chak jou yon Kadejak voye n touch

W a sonje
Dwa demontab
prèch egalite se ti pas kout
diplomasi nan fo mamit

W a sonje
toujou g on tizonnay k ap folile anndan n
yon giyon k ap domestike rèl nou
Toujou g on fanm soufrans ap adopte
pla men n chaje sèkèy
Elas
Kòlè n kout
Dwadelòm pa gen pasyans

Epi sonje…
jodi a pa jou doulè frèt
jou lanmou pouse chè
Demen pyès powèm p ap pran ka n
Se jou pou n bay istwa akolad
Jou pou n wose ak rèv nou
epi aprann volonte n najeSèlman…
Sonje omaj pa pyese ren
S on blag sèk pou desann tansyon wo
Demanti m !