Se nan bay pwomès vanite bourad

rèv nou pran chimen kwochi

Lavni kouri pran devan n

pou kwape chans nou

Se nan penpennen nan mizik boula

ki soti nan ren tanbou

Sikonstans lavi soule bonnanj nou

Se nan ekilibre diskou palmantè

ak aplodisman

rèl nou fonn sou lang

Se nan fè ògèy laplanch

vag fè jeretyen nan lavi n

pou twoke byennèt nou

Ta sanble pa bò isit

nanpwen moun


ki ka koupe karès leta kout je

Jessica Nazaire – Pwa grate